terejat

Kosovarët kërkojnë nënshtetësinë shqiptare ******************************************************** Vendimi për heqjen e regjimit të vizave për Shqipërinë dhe fakti tjetër që Kosova tashme ka mbetur i vetmi vend i rajonit i izoluar, ka bërë që kosovarët t’i drejtohen shtetit amë. Dëshira për të lëvizur lirshëm në Evropë duket se shkon përtej dëshirës për t’u pajisur me një pasaportë shqiptare thjeshtë për çështje patriotizmi. Numri i shqiptarëve nga Kosova të cilët kërkojnë nënshtetësi shqiptare është rritur pas hyrjes së Shqipërisë në zonën Shengen, raporton Top Channel. Ambasadori i Shqipërisë në Kosovë, Islam Lauka, ka thënë se legjislacioni në fuqi e njeh të drejtën e nënshtetësisë për të huajt, por ky fakt nuk do të thotë që të gjithë mund ta kenë atë. Kjo për shkak se për këtë duhen plotësuar një varg kriteresh. “Janë të paktën tetë dokumente, apo kritere që duhet të plotësohen... Është shumë e rëndësishme që të sigurohet dokumenti për qëndrim rezident për të gjithë shtetasit e huaj minimum pesë vjet, për shtetasit kosovarë është tre vjet, edhe te ky afat tre-vjeçar ka rregulla që e lehtësojnë, shembull kush është i/e martuar me shtetas/e të Shqipërisë, qëndrimi një vjeçar i dokumentuar nga Ministria e Brendshme e Shqipërisë”, tha Lauka. Përveç këtyre kritereve, aplikuesi paraprakisht duhet t’i drejtohet me kërkesë presidentit të Shqipërisë ku duhet të paraqes arsyet e aplikimit. Dëshmia e pronësisë së banesës në Shqipëri është e domosdoshme e po kështu edhe dëshmia e penalitetit nga Ministria e Drejtësisë e Shqipërisë si dhe nga shteti që vjen. Në raste të veçanta shteti shqiptar është më dorëlëshuar, shtetësinë shqiptare pa ndonjë problem mund ta fitojnë kryesisht personalitete te shquara me merita të veçanta. Kjo bëhet me rekomandim të akademisë së shkencave apo ndonjë institucioni tjetër të rëndësishëm. Lëvizja e lirë në Evropë ka detyruar shumë shqiptarë të Kosovës që në rrugë ilegale të kërkojnë edhe nënshtetësi serbe, maqedonase e malazeze, shtete këto që u liberalizuan para një viti. /Telegrafi/